6. 6 дугаар сар 2023
Хэвлэлийн мэдээ
Нийгэм, эдийн засгийн орчинд оюуны өмч, бизнес эрхлэх санааг нэвтрүүлэхэд дэмжлэг үзүүлэхийн зэрэгцээ инновацийн шинэлэг бүтээгдэхүүн, үйлчилгээг бий болгоход чиглэсэн “Эрдэм Хакатон 2023”-ын хаалтын үйл ажиллагаа 6-р сарын 5-нд болох гэж байна. Уг сонирхолтой арга хэмжээ нь 2023 оны 5-р сарын 30-наас 6-р сарын 5-ны хооронд үргэлжлэх "Монголын инновацийн 7 хоног 2023"-ын хүрээнд зохион байгуулагдаж байгаа юм. Хакатоны сүүлийн өдөр оролцогчдын гайхалтай төслүүдийг танилцуулах демо өдөрлөг болох болно.
“Эрдэм Хакатон 2023” тэмцээний тэргүүн байрыг морин шарилжны ханд агуулсан гоо сайхны бүтээгдэхүүн гаргаж авсан “Артемис” төслийн багийнхан эзэлснээр 20 сая төгрөгийн шагналын эзэн болсон юм. Цемент агуулаагүй бетоныг харуулсан "Эко хөнгөн бетон" төсөл хоёрдугаар байранд шалгарч 10 сая төгрөгөөр шагнууллаа. Гуравдугаар байранд хиймэл оюун ухааны тусламжтайгаар ажилтны зан чанарыг тодорхойлж, ажилд авах үйл явцыг хөнгөвчлөх технологи бүтээсэн “Метаког” компани таван сая төгрөгийн шагнал хүртлээ.
Эрдэм Хакатон 2023-д мэдээллийн технологи, шинэ материалын технологи, биотехнологи/үйлдвэрлэлийн технологи, сэргээгдэх эрчим хүчний технологи, үндэсний онцлогтой соёлын инноваци, бүтээлч үйлдвэрлэл зэрэг инновацийн тэргүүлэх чиглэлийн салбарын бүтээгдэхүүнүүдийг төлөөлсөн төслүүд өрсөлдөж буй. Энэхүү арга хэмжээнд их дээд сургууль, эрдэм шинжилгээний байгууллага, хувийн хэвшлийн олон тооны авъяаслаг судлаачид, хөгжлийн шинжээчид, бизнес эрхлэгчид тодорхой асуудлыг шийдвэрлэх, амьдралд хэрэгжиж, үйлдвэрлэлд нэвтрэх боломжтой судалгааны үр дүн, оюуны өмч бүхий бизнес, инновацийн төсөлийн хүрээнд амжилттай оролцов.
БШУЯ-ы сайд Ч.Энх-Амгалан Хакатон тэмцээний үеэр бий болсон онцгой шинэлэг санаа, үр дүнтэй түншлэлийг сайшаан үг хэлэхдээ “Хамгийн сайн зөвлөгөө өгдөг хүн хамгийн их алдаа гаргасан байдаг юм. Алдаа гаргахаас айлгүй туршиж, судалж, бүтэлгүйтэж, туршлага хуримтлуулаарай” гэв.
“Эрдэм Хакатон 2023” арга хэмжээг Боловсрол Шинжлэх Ухааны Яам, Монгол Улсын Шинжлэх Ухааны Академи, Санхүү Эдийн Засгийн Их Сургууль, Эрдэнэт Шинжлэх Ухаан Технологийн Парк, Старт-Ап Монгол, Европын Холбооны санхүүжилттэй “Бүгд Залуусын Төлөө, Залуус Бүгдийн Төлөө” төсөл хамтран зохион байгуулж байгаа юм.
Энэ жил Эрдэм Хакатон-д 23 төсөл бүртгүүлсэн нь залуус асуудлыг шийдвэрлэх гарц, шийдэлд ямар их ач холбогдол өгч буйн баталгаа боллоо. Нэмж дурдахад “Apprentice” шоуны ялагч, “Ард Секьюритиз” компанийн гүйцэтгэх захирал Ц.Бархас, "Стартап Монгол" ТББ-ын үүсгэн байгуулагч З.Билэгбаатар, өмнөх хакатоны ялагчид төслийн оролцогчдод бизнесийн санаа, төслөө амжилттай танилцуулах, мөн илтгэх чадварыг сайжруулах зэрэг төрөл бүрийн сургалт, зөвлөгөө өгч байсан юм.
Монгол Улсын ирээдүйг тодорхойлох боломжтой шинэлэг санаа, боломжоор дүүрэн, эрч хүчтэй уг арга хэмжээнээс оролцогч, үзэгч бүгд бүтээлч байдал, хамтын ажиллагааг мэдэрсэн үйл ажиллагаа болов.
